Научниците открија начин за „реактивирање“ на имунолошкиот систем за борба против ракот на дебелото црево

ЛОНДОН (АА) - Истражувачите во Ирска открија начин за реактивирање на имунолошкиот систем на телото за да помогнат во справувањето со ширењето на ракот на дебелото црево, што е опишано како голем пробив во разбирањето на болеста, јавува Анадолу.

Истражувањето, спроведено од научниците на Универзитетот во Голвеј, испитувало како колоректалниот карцином влијае врз имунолошкиот систем и како овој процес може да се преобрати со цел подобри резултати во лекувањето.

Имунотерапијата – која ги користи природните одбранбени механизми на телото за да ги пронајде и уништи клетките на ракот – донесе револуција во третманот на болести како што се меланом и рак на белите дробови. Сепак, нејзината ефикасност досега беше ограничена кога станува збор за рак на дебелото црево.

Тимот од Голвеј најпрво идентификувал како болеста успева да го „исклучи“ имунолошкиот систем, а потоа открил начин како повторно да го „вклучи“.

Научниците утврдиле дека структурните клетки кои го поддржуваат растот на туморот можат да ги „заробат“ клетките што инаку би се бореле против него, со што практично се блокира природната одбрана на телото.

Откако го откриле ензимот одговорен за овој процес, истражувачите употребиле лекови наречени сијалидази за да ги реактивираат клетките што се борат против туморот. Ова довело до намалување на големината на туморот и спречување на понатамошно ширење на ракот.

Ракот на дебелото црево е втора водечка причина за смрт од рак во светот и секоја година погодува повеќе од 2.500 луѓе во Ирска. На глобално ниво, лекарите забележуваат пораст на случаите кај помлади лица, при што бројот на рано дијагностицирани пациенти речиси се удвоил од 1990 година наваму.