Пожарникарите успешно ги ставаат под контрола најразорните шумски пожари во историјата на Јужна Кореја

ИСТАНБУЛ (АА) - Илјадници пожарникари успешно ги ставаат под контрола најразорните шумски пожари во историјата на Јужна Кореја благодарение на подобрата видливост и пониските температури по дождот во текот на ноќта, јавува Анадолу.

„Планираме да ги мобилизираме сите расположливи ресурси за да ги изгаснеме главните пламени јазици до крајот на денот“, изјави Лим Санд-соп, шеф на Корејската шумарска служба (КФС), пренесе новинската агенција Јонхап.

Според Лим, подобрените временски услови создале поволна ситуација за ставање на пожарите под контрола.

Степенот на совладување на големиот шумски пожар во Уисеонг, кој веќе осум дена се шири во други региони, достигнал 95 отсто, соопштија властите.

Централниот штаб за управување со катастрофи и безбедност информира дека во пожарите во северните и јужните провинции Ѓеонгсанг, 28 лица ги загубиле животите, а 37 се повредени, според Јонхап.

Повеќе од 37.000 жители се раселени, а 30.000 од нив во областите Уисеонг и Андонг, околу 190 километри југоисточно од Сеул.

Шумските пожари опустошија огромни површини, при што изгореа 48.000 хектари шумско подрачје, според владините податоци.

Досега 20.485 луѓе се вратиле во своите домови по евакуацијата, а 16.700 сè уште се во привремени засолништа.

Во трагичен инцидент загинале три постари лица кога возилото во кое се наоѓале било зафатено од пламен за време на евакуацијата на старечки дом во кој биле сместени 21 жител на возраст од 70 и 80 години, во Јеонгдок-јуп, во округот Јеонгдок.

Огнот, исто така, го уништи историскиот храм Гоунса во округот Уисеонг, кој првично бил изграден во 681 година од будистички монах за време на династијата Сила. Културните власти успеале да ги спасат камениот седечки Буда од 9 век и други историски артефакти пред огнот да ја зафати локацијата.

Од почетокот на пожарите минатиот петок во округот Санчеонг, во провинцијата Јужен Ѓеонгсанг, мобилизирани се илјадници пожарникари, десетици хеликоптери и амбулантни возила. Пожарите, поттикнати од силни ветрови, брзо се прошириле кон север, зафаќајќи ги Уисеонг, Андонг, Чеонгсонг, Јеонгјанг и Јеонгдок.

Јужнокорејската војска, исто така, прати повеќе од 5.000 војници и распореди 146 хеликоптери за да помогнат во гаснењето на пожарите заедно со илјадници пожарникари.

Универзитетот Кореја во средата објави дека ќе понуди стипендии за студентите од областите погодени од пожарите.