Театарот како отпор: Актерите од сириски Идлиб преку претстава укажаа на тортурата во затворите на Асадовиот режим

ИДЛИБ (АА) - БУРАК КАРАЏАОГЛУ / АХМЕТ КАРААХМЕТ -

Група актери од сирискиот град Идлиб одлучија преку театарска претстава да укажат на тортурата врз цивилите што се притворени во затворите на режимот на сирискиот претседател Башар ал Асад, пишува Агенција Анадолија (АА).

Екипата на АА присуствуваше на изведувањето на претставата во малиот културен центар во Идлиб, со која уште еднаш е потврдена важноста на културата и уметноста како средство за пружање отпор во подрачјата зафатени со војна.

Темата на театарската претстава е тортурата врз цивилите во режимските затвори, а еден од актерите, Зекерија Сефло, за АА изјави дека оваа претстава ќе ја изведуваат сè додека не бидат ослободени цивилите.

„Ќе продолжиме да го креваме гласот и да ја изведуваме претставата сè додека не биде пуштен и последниот затвореник“, рече Сефло.

Театарскиот режисер и автор на претставата, Ибрахим Сермини, истакна дека со оваа претстава сакаат да прикажат во каква психолошка состојба се наоѓаат цивилите затворени во затворите на Асад.

„Во претставата го реконструиравме бруталното измачување со кое се соочуваат затворениците“, рече Сермини, наведувајќи дека нивна обврска е да ја раскажат оваа приказна.

„Не е можно да се пренесе ниту мал дел од болката што им се нанесува на затворениците. Со подготовките започнавме пред шест месеци. По интензивните проби успешно ја одигравме нашата претстава“, рече Сермини.

Сириски опозициски извори наведуваат дека во затворите и центрите за испитување се наоѓаат најмалку 500.000 луѓе, меѓу кои има и жени. Овој режим практикува физичко, психолошко и сексуално насилство врз цивилите во затворите.