Kosovë, Apeli kthen në rigjykim rastin e Oliver Ivanoviç-it

PRISHTINË (AA) - Gjykata e Apelit të Kosovës ka vendosur të enjten që lënda e Oliver Ivanoviçit të kthehet në rigjykim, me çka është anuluar vendimi i shkallës së parë, i cili Ivanoviçin e shpalli fajtor për krime lufte, raporton Anadolu Agency (AA).

Lideri i Nismës Qyetare SDP, Oliver Ivanoviç me vendimin e shkallës së parë ishte dënuar me nëntë vite burg, me akuzën për krime lufte mbi civilët shqiptarë në Mitrovicë në vitin 1999.

Nënkryetarja e NQ- SDP, Ksenija Bozoviç, për AA ka konfirmuar se Oliver Ivanoviçit dhe avokatëve të tij sot u është dorëzuar vendimi për rikthimin e procesit gjyqësor nga fillimi.

“Kjo konfirmon atë që ne e pohonim se nuk ka prova për verdiktin prej nëntë vitesh burg. Duket se drejtësia po kthehet në Kosovë”, tha Bozhoviç.

Sipas saj, javën e ardhshme Ivanoviç do ti kthehet familjes së tij, miqve dhe bashkëpartiakëve.

Nga 27 janari i vitit 2014 ai gjendet në paraburgim.