Sarajevë, hapet edicioni i dytë i AJD Industry Days @AJB DOC

Në kuadër të Festivalit të gjashtë të Filmit Dokumentar Al Jazeera Balkans (AJB DOC), i cili u hap mbrëmë, ka filluar edicioni i dytë i platformës industriale AJD Industry Days @AJB DOC, i cili do të zgjasë deri më 11 shtator, raporton Anadolu.

Al Jazeera Documentary Industry Days @ AJB DOC, një platformë për profesionistë nga industria e dokumentarit me qëllim fuqizimin dhe mbështetjen e zgjerimit të prodhimit të filmit dokumentar në botë, organizohet bashkërisht nga Al Jazeera Documentary Channel dhe AJB DOC Film Festival.

Në ceremoninë e hapjes, Adil Ksiksi, i cili drejton projektin AJD Industry Days, iu adresua producentëve duke prezantuar projektet e tyre, vendimmarrësve dhe të ftuarve të Festivalit dhe përshëndeti të gjithë autorët dhe producentët që punuan shumë për përgatitjen e projekteve të tyre.

"Të lumtur që do të dëgjojmë për projekte që vijnë nga Somalia, Gjermania, Rumania, Bosnja, por edhe nga bota arabe dhe që do të punojmë me autorë të rinj që prezantojnë projektet e tyre të para", tha Ksiksi.

Ai gjithashtu falënderoi partnerët dhe sponsorët që e mbështetën organizimin.

Drejtori i Festivalit, Edhem Foço u uroi të gjithë pjesëmarrësve suksese në punën e tyre, duke përmbledhur të arriturat e organizimit të vitit të kaluar.

"Edicionin e vitit të kaluar e konsideroj shumë të suksesshëm sepse më shumë se gjysma e projekteve të paraqitura morën një lloj mbështetjeje dhe një çmim. Filmi i paraqitur në kategorinë 'Work in Progress' ndërkohë ka përfunduar, ka aplikuar në Festivalin tonë dhe është përfshirë në 'Përzgjedhja e konkursit', e cila nuk ishte aspak e lehtë. Kjo do të thotë se jemi në rrugën e duhur", tha Foço, duke u kujtuar pjesëmarrësve që të mos harrojnë të shijojnë ofertën turistike të Sarajevës.

Kujtojmë se nga 177 projekte të paraqitura nga 52 vende nga rajoni MENA, Evropa Juglindore dhe Kaukazi, në listën e ngushtë u përfshinë 22 finalistë me projekte mbresëlënëse, të cilat do të prezantohen gjatë tre ditëve të punës në tri kategori: "Main Pitch", "Work in Progress" dhe "Balkan Stars".

Këtë vit, AJD Industry Days @AJB DOC ofron çmime të rëndësishme bashkëprodhimi me vlerë 70 mijë dollarë si dhe mundësinë për të fituar çmime në para të partnerëve që arrijnë në rreth 20 mijë dollarë dhe çmime të tjera të vlefshme shërbimi.

Agjencia e lajmeve Anadolu është partneri global i komunikimit i AJB DOC.