İdris Okuducu
25 Shtator 2017•Përditësim: 25 Shtator 2017
ERBIL (AA) – Ka filluar procesi i votimit për referendumin kontrovers të Administratës Rajonale Kurde në veri të Irakut të cilën Gjykata Federale e Irakut e shpalli jokushtetues, raporton Anadolu Agency (AA).
Për referendumin e njëanshëm të Administratës Rajonale Kurde në veri të Irakut të cilin e bojkotojnë turkmenët dhe arabët, janë hapur vendvotime në qytetet Erbil, Sulejmanije dhe Duhok si dhe në të gjithë Kirkukun statusi i të cilit është i diskutueshëm, qarku Tuzhurmatu i krahinës Sahaladdin, qarku Hanekin i krahinës Dijala dhe në qytezat Xhevavla dhe Karatepe.
Referendumi po mbahet edhe në qarqet Sinxhar, Mahmur, Telkejf, Hamdanije dhe Sheyhan të provincës Mosul, e cila u çlirua nga organizata terroriste DEASH, si dhe në qytezat Zummar, Rabia, Nemrud dhe Bartilla.
Procesi i votimit filloi në 12 mijë vendvotime, 7 mijë brenda Administratës Rajonale Kurde në veri të Irakut dhe 5 mijë në rajonet e diskutueshme.
Sipas të dhënave të Komisionit të Lartë të Zgjedhjeve dhe të Referendumit të Administratës Rajonale Kurde në veri të Irakut numri i votuesve që pritet të marrin pjesë në këtë referendum, përfshirë edhe rajonet e diskutueshme, është 5 milionë e 200 mijë.
Shpërndarja e votuesve sipas qyteteve:
- Erbil: 1 milion e 200 mijë
- Sulejmanije: 1 milion e 280 mijë
- Kirkuk: 750 mijë
- Duhok: 800 mijë
- Mosul: 750 mijë
Vendet tjera: 420 mijë
Vendimi i diskutueshëm për referendum i Administratës rajonale kurde në veri të Irakut
Kryetari i Administratës Rajonale Kurde në veri të Irakut, Mesut Barzani pas një takimi të zhvilluar me partitë politike më 7 qershor deklaroi se më 25 shtator do të organizojnë referendum, përfshirë Kirkukun dhe rajonet tjera të diskutueshme.
Ndërsa kryeministri i Irakut, Hajdar el-Ibadi, pas shpalljes së referendumit nga Barzani tha se "Kjo nismë është në kundërshtim me kushtetutën dhe se nuk do të njohin rezultatin". Gjithashtu edhe Gjykata Federale e Irakut me të njëjtin arsyetim vendosi për ndalimin e referendumit duke e shpallur atë si të pavlefshëm.
SHBA ka paralajmëruar se është i rrezikshëm vendimi mbi referendumin i cili ka shkaktuar debate të mëdha dhe bëri thirrje që i njëjti të anulohet menjëherë.
