Franca i kërkon BE-së të jetë "më e ashpër" kundër Britanisë në çështjen e peshkimit

Kryeministri francez, Jean Castex, deklaroi se ka kërkuar nga Bashkimi Evropian (BE) të jetë "më i ashpër" kundër Britanisë së Madhe lidhur me kushtet e peshkimit të vendosura pas Brexit-it, pasi vendi refuzon të lejojë peshkatarët francezë të peshkojnë në ujërat britanike, raporton Anadolu Agency (AA).

Në një fjalim në Asamblenë Kombëtare, Castex tha se BE-ja duhet të jetë e kujdesshme nëse Britania po respekton marrëveshjen e Brexit-it.

Duke vënë në dukje se ai e kishte diskutuar çështjen me Presidenten e Komisionit Evropian, Ursula von der Leyen, ai tha se i kërkoi BE-së të "ndërmarrë veprime" dhe "të jetë më strikte" kundër Britanisë lidhur me kushtet e peshkimit.

Ai shtoi se nëse kjo nuk do të jetë e mjaftueshme dhe se ata do të aplikojnë në gjykatën e arbitrazhit dhe do të hedhin një vështrim më gjithëpërfshirës në kushtet nën të cilat po zbatohen marrëveshjet e nënshkruara nën kujdesin e BE-së.

Castex paralajmëroi se bashkëpunimi me Britaninë e Madhe do të vihet në dyshim nëse është e nevojshme.

Clement Beaune, ministër shteti për çështjet evropiane, gjithashtu theksoi në një deklaratë se do të marrin masa në ditët e ardhshme që përfshijnë presion mbi Britaninë e Madhe në BE ose në nivel kombëtar.

Administrata e ishullit britanik Jersey ka njoftuar se ka lëshuar licenca për 64 anije peshkimi franceze që dëshirojnë të vazhdojnë peshkimin në ujërat e saj, ndërsa ka refuzuar të lëshojë licenca për 75 të tjera.

Tensionet filluan të rriten midis Francës dhe Britanisë në maj kur administrata e ishullit Jersey u kërkoi anijeve franceze të peshkimit që donin të vazhdonin peshkimin në ujërat e saj për të siguruar dëshmi të aktiviteteve të kaluara të peshkimit sipas Marrëveshjes Tregtare të BE-së të nënshkruar pas Brexit-it.

Përveç kësaj, Franca kishte kërcënuar se do të ndërpriste energjinë elektrike të ishullit Jersey, dhe peshkatarët francezë kishin kërcënuar se do të bllokonin portin e ishullit.

Qeveria britanike kishte dërguar gjithashtu dy anije të marinës në Jersey si "masë paraprake". Si përgjigje, Franca dërgoi gjithashtu dy anije të marinës në ishull.

Jersey, ishulli më i madhi i Kanalit, furnizohet me 95 për qind të energjisë elektrike nga Franca, që është rreth 14 milje larg. Ishulli, i cili ka administratën e tij, përfaqësohet nga Britania e Madhe në arenën ndërkombëtare.