"Franca po shqyrton vendosjen e trupave në Grenlandë"

Franca po shqyrton vendosjen e trupave në Grenlandë në përgjigje të komenteve kontroverse të presidentit amerikan Donald Trump për blerjen e ishullit të Arktikut, tha sot ministri i Jashtëm francez Jean-Noel Barrot, transmeton Anadolu.

Barrot konfirmoi se Franca e ka diskutuar çështjen me Danimarkën, por theksoi se nuk ka plane të menjëhershme për veprim.

“Në këtë pikë, kjo nuk është dëshira e Danimarkës”, tha Barrot në një intervistë me “Sud Radio”, duke shtuar se Evropa do të vepronte nëse kërcënohen interesat e sigurisë.

Komentet vijnë pasi Danimarka kërkon mbështetje evropiane për të kundërshtuar interesin në rritje të Trumpit për Grenlandën. Trump ka përmendur burimet natyrore dhe vlerën strategjike të ishullit, duke thënë: “Unë mendoj se do ta kemi atë”.

Kryeministrja daneze Mette Frederiksen është takuar me liderët evropianë për të diskutuar këtë çështje dhe ka hedhur poshtë çdo kërcënim të menjëhershëm ushtarak ndaj Grenlandës. Ajo ka theksuar rëndësinë e bashkëpunimit transatlantik.

Barrot e përshkroi rajonin e Arktikut si “një fushë të re konflikti”, ndërsa Frederiksen ka sinjalizuar një qasje të kujdesshme, duke shmangur një përshkallëzim të tensioneve.

Danimarka njoftoi së fundmi një investim prej 2 miliardë eurosh në mbrojtjen e Arktikut.