Gjermania ende ngurruese për dërgimin e avionëve luftarakë në Ukrainë

Ministrja e Jashtme gjermane Annalena Baerbock shprehu edhe një herë rezerva në lidhje me kërkesën e Ukrainës për dorëzimin e avionëve luftarakë perëndimorë, raporton Anadolu Agency (AA).

Në fillim të takimit të ministrave të jashtëm të G7-ës në qytetin verior të Gjermanisë Weissenhaus, Baerbock iu referua qëndrimit të mëparshëm për krijimin e zonave të ndaluara për fluturime.

“Tashmë jemi pozicionuar qartë kur bëhet fjalë për (dërgimin e) materialit të fluturimit”, u tha ministrja përfaqësuesve të mediave.

Gjermania dhe NATO janë rreptësisht kundër krijimit të një zone të ndaluar fluturimi mbi Ukrainë, pasi ka frikë se zbatimi i saj mund të çojë në një konfrontim të drejtpërdrejtë midis NATO-s dhe Rusisë dhe se do të ekzistonte rreziku që lufta në Ukrainë të përshkallëzohej në mënyrë dramatike.

Ndërkohë, Baerbock theksoi se grupi G7 dëshiron të sigurojë që Ukraina mund të mbetet një eksportues i madh i drithërave pavarësisht luftës ruse në vend.

Ajo vuri në dukje se takimi i G7-ës në Weissenhaus do të fokusohet gjithashtu në mënyrën se si të zhbllokohet bllokada ruse e grurit të vendosur kundër Ukrainës.

Aktualisht, 25 milionë tonë drithë janë bllokuar në portet e Ukrainës, veçanërisht në Odesa, për shkak të luftës, tha Baerbock.

Gruri është i nevojshëm urgjentisht në vendet afrikane dhe në Lindjen e Mesme, tha ministrja.

Një krizë ushqimore po krijohet në horizont, e cila do të përkeqësohet nga ndikimi global i klimës, shtoi ajo.

Ukraina është një nga furnizuesit më të rëndësishëm të grurit në mbarë botën.

Sipas shifrave nga Organizata e OKB-së për Ushqimin dhe Bujqësinë, vendi vitin e kaluar ishte ende eksportuesi i tretë më i madh i elbit dhe eksportuesi i pestë më i madh i grurit.

Ministrja e Jashtme gjermane dhe homologët e saj të G7-ës sonte po diskutojnë efektet e luftës ruse në Ukrainë.

Bisedimet e G7-ës do të ndalen gjithashtu në rolin e Kinës dhe situatën në Indo-Paqësor.

Takimi do të fokusohet gjithashtu në situatën në Afganistan, Afrikë dhe Lindjen e Mesme, si dhe luftën e përbashkët kundër krizës klimatike dhe pandemisë së koronavirusit.

Ministrat e jashtëm të Ukrainës dhe Moldavisë fqinje, e cila ka frikë që mund të jetë objektivi i ardhshëm ushtarak i Rusisë, janë ftuar gjithashtu të marrin pjesë si mysafirë.

Ministrja e Jashtme indoneziane Retno Marsudi do t’i bashkohet takimit përmes video-lidhjes. Indonezia aktualisht kryeson G20-ën.

Këtë të shtunë, takimi do të kalojë në konsultime jozyrtare mes ministrave të jashtëm të NATO-s në Berlin, ku situata në Ukrainë ka të ngjarë të jetë sërish në fokus.

Gjermania aktualisht kryeson grupin G7, i cili përfshin SHBA-në, Kanadanë, Francën, Britaninë e Madhe dhe Italinë, si dhe Japoninë.