Betül Yürük
27 Mars 2017•Përditësim: 27 Mars 2017
KOMBET E BASHKUARA (AA) - Fondi i Emergjencës i Kombeve të Bashkuara për Fëmijët (UNICEF) njofton se gjatë vitit të fundit, është dyfishuar numri i fëmijëve të vdekur, plagosur, ose të detyruar për të marrë pjesë në luftë, raporton Anadolu Agency (AA)
Në raportin e publikuar nga UNICEF tërhiqet vëmendja e gjendjes njerëzore në Jemen, në shtetin më të varfër të Lindjes së Mesme, i cili po hyn në vitin e tretë që ndodhet në luftë.
Më tej thuhet se Jemeni po përballet me rrezikun e urisë për shkak të përleshjeve. Bëhet e ditur se rreth gjysëm milion fëmijë përballen jashtëzakonisht me të ushqyerit e pamjaftueshëm.
Një mijë e 500 fëmijë të vrarë
Në raport, theksohet se 80 përqind e popullsisë ka nevojë për ndihma humanitare dhe se numri i fëmijëve të detyruar për të marrë pjesë në luftë po rritet çdo ditë e më shumë, kurse dy të tretat e vajzave po martohen para moshës 18 vjeçare.
Sipas raportit të UNICEF-it, në Jemen ku po vazhdon lufta e brendshme, numri i fëmijëve të vdekur, plagosur, ose të detyruar të marrin pjesë në luftë, gjatë vitit të fundit, është rritur për rreth dyfish më shumë.
Numri i fëmijëve të vrarë nga 900 është rritur për në 1.500, numri i fëmijëve të plagosur prej rreth 1.300 në 2.450, dhe numri i fëmijëve të detyruar për të luftuar nga 850 është rritur në 1.580. Ndërkaq, numri i sulmeve dhe bombardimeve ndaj shkollave është rritur katërfish, duke arritur numrin 212.
2 milionë fëmijë pa shkolla
Në këtë shtet ku edhe sistemi shëndetësor është rrënuar, sipas raportit, 15 milionë njerëz nuk kanë qasje në shërbime shëndetësore, kurse 106 njerëz kanë vdekur për shkak të kolerës dhe diarresë akute.Në raport mes tjerash bëhet e ditur se rreth 1.600 shkolla janë dëmtuar ose tanimë janë të papërdorshme për shkak se përdoren si strehimore nga familjet e larguara nga vendet e tyre. Poashtu sipas këtij raporti, 2 milionë fëmijë nuk mund të shkojnë në shkollë.
