Rabia İclal Turan
30 Dhjetor 2020•Përditësim: 30 Dhjetor 2020
Këshilli Evropian ka njoftuar se ka miratuar me procedurë të shkruar vendimin mbi nënshkrimin e marrëveshjes tregtare pas Brexit-it midis Bashkimit Evropian (BE) dhe Mbretërisë së Bashkuar, transmeton Anadolu Agency (AA).
Gjatë ditës, marrëveshja do të nënshkruhet nga të dy palët. Presidenti i Këshillit Evropian, Charles Michel dhe presidentja e Komisionit Evropian, Ursula von der Leyen, do ta nënshkruajnë në Bruksel, ndërsa kryeministri britanik, Boris Johnson, do ta nënshkruajë në Londër.
Marrëveshja do të zbatohet "përkohësisht" pasi Mbretëria e Bashkuar të largohet nga tregu i vetëm i BE-së më 1 janar të vitit 2021.
Marrëveshja akoma ka nevojë për miratim nga Parlamenti Evropian, i cili nuk pritet të ndodhë para 28 shkurtit.
Bisedimet tregtare pas Brexit-it
Britania votoi të largohet nga BE-ja në një referendum të vitit 2016, me 52 për qind në favor dhe 48 për qind kundër. Vendi u largua zyrtarisht nga BE-jë në fund të janarit të këtij viti. Që nga ajo kohë, ajo ka qenë në një periudhë tranzicioni, që do të thotë se Mbretëria e Bashkuar vazhdoi të ndjekë rregullat e BE-së përderisa punonte për një marrëveshje të re tregtare.
Brukseli dhe Londra arritën një marrëveshje tregtare pas Brexit-it më 24 dhjetor, pas disa muajve të negociatave dhe vetëm një javë para fundit të periudhës së tranzicionit.
Negociatat kanë qenë të ashpra, me mosmarrëveshje të përqendruar në tre çështje kryesore, respektivisht mbi të drejtën peshkimit, mbi të ashtuquajturën "fushë loje të barabartë" apo sigurimin e konkurrencës së ndershme, si dhe mbi mënyrën se si do të zbatohet marrëveshja.
