Martirizohet palestinezi nga forcat izraelite në Bregun Perëndimor

RAMALLAH (AA) – Ushtria e Izraelit ka bërë të ditur se forcat izraelite kanë vrarë një palestinez pasi makina e tij u përplas në një stacion autobusi pranë vendbanimit në Bregun Perëndimor, transmeton Anadolu Agency (AA).

Në një deklaratë nga ushtria izraelite theksohet se forcat hapën zjarr mbi personin pasi ai u përpoq të largohej.

Në mesin e forcave izraelite nuk u raportua për lëndime, ndërsa ushtria tha se incidenti nuk ishte një sulm “terrorist”.

Javën e kaluar, të paktën 18 palestinezë u vranë nga armë zjarri izraelite gjatë tubimeve që kërkonin kthimin e refugjatëve pranë kufirit të Rripit të Gazës.

Ndërkohë forcat izraelite arrestuan 11 palestinezë gjatë bastisjeve njëditore në Bregun Perëndimor.

Ushtria bëri të ditur se individët u arrestuan për “përfshirje të dyshuar në aktivitete terroriste”.

Sipas shifrave palestineze, afërsisht 6.400 palestinezë mbahen aktualisht në burgjet izraelite, duke përfshirë dhjetëra gra dhe 300 të mitur.