Mbështet protestuesit palestinezë duke shpërndarë bukë të gatuar

GAZA (AA) – Palestinezja Suha Kaddih (65) mbështet palestinezët të cilët protestojnë në kufirin lindor të Han Junus-it, në jug të Gazës në kuadër të Marshimit të Madh të Kthimit, duke u shpërndarë bukët e gatuara me familjen e saj.

Në një prononcim për Anadolu Agency (AA), Kaddih thotë se ka marrë pjesë në protestën e organizuar në kufirin e Gazës dhe se së bashku me të gjithë anëtarët e familjes kanë gatuar bukë në saç dhe ua kanë shpërndarë protestuesve.

Ajo thotë se ndjen një gëzim të madh për këtë. Kaddih thotë se “Duke pjekur bukën në saç e mbaj gjallë kulturën palestineze dhe e mbështes rezistencën e palestinezëve protestues, të lodhur nga plumbat dhe gazi i hedhur nga Izraeli”.

Sipas saj, veprimet e tilla do të kontribuojnë në kthimin e palestinezëve të dëbuar në tokat e tyre.

Kaddih thotë se nuk frikësohet nga marrja në objektiv nga ushtarët izraelitë. “Nuk frikësohemi nga hebrenjtë. Ne do të vazhdojmë të rezistojmë në këto toka sa do që persona të vrasin. Ne kemi të drejtë dhe nuk do të heqim dorë nga kërkesa për të drejtat tona”, tha Kaddih.

Palestinezët që nga 30 marsi, dita e premte e deri më tani në kufirin e Rripit të Gazës me Izraelin organizojnë protesta paqësore në kuadër të përkujtimit të 42 vjetorit të Ditës së Tokës.

Ndërsa ushtria izraelite shtie me plumba të vërtetë kundër popullatës civile, e cila kërkon “kthimin në tokat nga të cilat u dëbuan dhe heqjen e bllokadës së paligjshme të zbatuar ndaj Gazës që nga viti 2006”. Që nga dita e parë e protestës 18 palestinezë kanë rënë dëshmorë ndërsa më shumë se 1.500 të tjerë janë plagosur.

Palestinezët mendojnë që këto protesta paqësore t’i vazhdojnë për 6 javë.

- Çfarë është Dita e Tokës?

“Në Ditën e Tokës”, ku përkujtohen incidentet pas pushtimit të mijëra hektarëve tokë të cilat u përkisnin palestinezëve më 30 mars të vitit 1976, popullata që nga orët e mëngjesit filloi të mblidhet në kufi, duke marrë pjesë në thirrjen për “Marshimin e Madh të Kthimit”, thirrje të cilën e kanë bërë disa ditë më parë grupet palestineze.

Izraeli më 30 mars të vitit 1976 ka pushtuar mijëra hektarë tokë të palestinezëve shtetas të Izraelit të cilët jetonin në rajonin Celile, në veri të shtetit. Pas kësaj popullsia palestineze, hyri në grevë të përgjithshme për të protestuar kundër kësaj grabitjeje.

Policia izraelite ka hapur zjarr ndaj personave që morën pjesë në protesta, ku ranë dëshmorë 6 persona ndërsa një numër i madh i të tjerëve u plagosën.

Ky rast i cili njihet si “Dita e Tokës”, vlerësohet si simbol i rezistencës së palestinezëve të treguar për çështjen e tokës, e cila është burim i përleshjeve mes Izraelit dhe Palestinës.