Ndërprerja masive e energjisë elektrike e zhyt Pakistanin në errësirë

Një defekt i madh i energjisë ka zhytur Pakistanin në errësirë pasi një linjë kryesore e furnizimit u prish sonte, transmeton Anadolu Agency (AA).

Defekti i cili cilësohet si një nga më të këqijtë në vitet e fundit, goditi kryeqytetin Islamabad dhe qytetin tregtar Karaçi, si dhe qytetet Lahore, Rawalpindi, Multan, Faisalabad, Hyderabad dhe madje edhe pjesë të Kashmirit të administruara nga Pakistani.

Duke konfirmuar ndërprerjen e energjisë, një zëdhënës i Ministrisë së Ujit dhe Energjisë tha në një deklaratë se frekuenca e furnizimit "papritmas" ra në nivelin zero, duke shkaktuar një defekt të madh në të gjithë vendin.

Ai tha se arsyeja për ndërprerjen e papritur të frekuencës së furnizimit ende nuk dihet.

Sipas mediave lokale, ndërprerja gjithashtu shkaktoi që të aktivizohen gjeneratorët rezervë në ndërtesat dhe institucionet e rëndësishme qeveritare, duke përfshirë Presidencën, Kryeministrinë, Gjykatën e Lartë, aeroportet dhe institucionet tjera.

Transmetuesi lokal ARY News, duke cituar zyrtarë anonimë të Ministrisë së Ujit dhe Energjisë, raportoi se do të nevojiten orë të tëra për të rikthyer energjinë elektrike.

Sipas raportimeve, një defekt në një fabrikë qymyri të kapacitetit 1,320 mw në qarkun verilindor Sahiwal thuhet të jetë arsyeja e ndërprerjes së energjisë elektrike.