Omicron dhe Delta çojnë në mbylljen edhe të një rajoni tjetër në Kinë

Një rajon tjetër në provincën qendrore Henan të Kinës është mbyllur për shkak të rritjes së rasteve lokale me koronavirusin (COVID-19), të nxitura nga llojet Omicron dhe Delta, transmeton Anadolu Agency (AA).

Komisioni Kombëtar i Shëndetit i Kinës njoftoi se vendi regjistroi 221 raste të reja dhe se 166 prej tyre u transmetuan në nivel lokal.

Siç raporton e përditshmja kineze "Global Times", vetëm provinca Henan gjatë ditës së kaluar regjistroi 118 raste, duke çuar në mbylljen e qarkut Huaxian nga autoritetet e vendit.

Qyteti verior Tianjin regjistroi 33 raste mes masave të bllokimit dhe testimeve masive.

Dje, autoritetet vepruan me shpejtësi për të vendosur një bllokim në qytetin Anyang, pasi në qytet u zbuluan dy raste të llojit Omicron të koronavirusit.

Këtë mëngjes, Anyang raportoi 123 raste me COVID-19, ndërsa autoritetet po nisin një raund të ri të testimit.

Që kur koronavirusi u shfaq për herë të parë në dhjetor të vitit 2019, Kina ka raportuar 104.189 raste me COVID-19, përfshirë 4.646 vdekje.