Pakistan, fillon votimi për zgjedhjet e përgjithshme
Më shumë se 128 milionë votues të regjistruar kanë të drejtë vote pas përfundimit të fushatës së egër dhe intensive që u shënua me sulme terroriste
Mëngjesin e sotëm në Pakistan u hapën qendrat e votimit për zgjedhjet e përgjithshme, ku miliona votues do të përcaktohen për të zgjedhur qeverinë e re për 5 vitet e ardhshme, në mes të masave të shtuara të sigurisë, sipas zyrtarëve dhe mediave lokale, transmeton Anadolu.
Pamjet e transmetuara nga kanalet televizive treguan votuesit në radhë para qendrave të votimit në kryeqytetin Islamabad si dhe në Lahore, Karaçi, Peshawar, Kueta dhe qytete të tjera. Votimi do të vazhdojë deri në orën 17:00 me kohën lokale.
Më shumë se 128 milionë votues të regjistruar kanë të drejtë vote pas përfundimit të fushatës së egër dhe intensive që u shënua me sulme terroriste. Fletëvotimet do të hidhen për 266 ulëse të Dhomës së Ulët e njohur gjithashtu si Asambleja Kombëtare dhe 749 vende të përgjithshme të katër asambleve provinciale të vendit.
Mijëra policë dhe trupa paraushtarake janë dislokuar në të gjithë vendin për të siguruar zgjedhje paqësore në sfondin e sulmeve të fundit militante në disa qendra votimi në jugperëndim të Baloçistanit dhe provincat veriperëndimore Khyber Pakhtunkhwa.
Qeveria pezulloi përkohësisht shërbimin e telefonisë celulare në të gjithë vendin përpara zgjedhjeve pas sulmeve terroriste, thuhet në deklaratën e Ministrisë së Punëve të Brendshme. Sipas Komisionit Zgjedhor të Pakistanit (ECP), 28.626 kandidatë nga rreth 150 parti politike garojnë për ulëse në Asamblenë Kombëtare dhe asambletë provinciale në të gjithë vendin.
Rreth 100 vëzhgues ndërkombëtarë janë në Pakistan për të monitoruar votimet, njoftoi Ministria e Informacionit.
Pritet një garë e ashpër trepalëshe midis Lidhjes Muslimane Pakistan-Nawaz të udhëhequr nga Nawaz Sharif i cili ka qenë tre herë kryeministër i vendit, Partisë Popullore të Pakistanit të qendrës së majtë të kryesuar nga ish-ministri i Jashtëm Bilawal Bhutto Zardari dhe kandidatëve të pavarur të mbështetur nga Partia Tehreek-e- Insaf, e themeluar nga ish-kryeministri Imran Khan, i cili është në burg.
Ai është dënuar në tre raste të veçanta, përfshirë ato që kanë të bëjnë me korrupsionin dhe nxjerrjen e sekreteve shtetërore. ECP e ka ndaluar partinë e tij të përdorë simbolin ikonik elektoral të shkopinjve të kriketit për të identifikuar kandidatët që garojnë në votime.
Disa parti të tjera rajonale dhe religjio-politike, përfshirë Jamaat-e-Islami, Jamiat Ulema-e-Islam, Lëvizja Muttahida Kaumi, Partia Kombëtare Avami dhe Partia Kombëtare e Baloçistanit garojnë për vende në asambletë kombëtare dhe provinciale.
Për formimin e qeverisë qendrore nevojiten 169 vende me një shumicë të thjeshtë. Pakistani ndjek një formë parlamentare të demokracisë ku Dhoma e Ulët zgjedh kryeministrin, i cili duhet të jetë anëtar i Asamblesë Kombëtare.
Katër asambletë provinciale zgjedhin udhëheqësit e tyre përkatës ose kryeministrat në të njëjtën mënyrë.
