Presidenti i Brazilit do të vizitojë Kinën

Presidenti i Brazilit, Luiz Inacio Lula da Silva, këtë javë do të udhëtojë në Kinë për një vizitë shtetërore katër-ditore, pasi mposhti pneumoninë që e detyroi të shtyjë udhëtimin, raporton Anadolu.

"Siç është rënë dakord nga të dyja palët, Presidenti Luiz Inacio Lula da Silva i Republikës Federative të Brazilit do të zhvillojë një vizitë shtetërore në Kinë nga 12 deri më 15 prill", bëri të ditur në një deklaratë zëdhënësja e Ministrisë së Jashtme të Kinës, Hua Chunying.

"Vizita tregon rëndësinë e madhe që të dyja palët i kushtojnë marrëdhënieve Kinë-Brazil", thuhet në deklaratë.

Ajo shtoi: "Mirëpresim ngrohtësisht Presidentin Lula dhe presim me padurim të punojmë me Brazilin për përmirësimin e bashkëpunimit tonë të dobishëm reciprok dhe për të sjellë më shumë energji pozitive për solidaritetin, bashkëpunimin dhe zhvillimin e përbashkët midis vendeve në zhvillim".

Lula gjithashtu konfirmoi vizitën në llogarinë e tij në Twitter, duke thënë se ajo ka për qëllim "të forcojë marrëdhëniet me partnerin tonë më të madh tregtar".

Kjo do të jetë vizita e tretë e Lula-s jashtë vendit, pas udhëtimeve ku u takua me Presidentin argjentinas Alberto Fernandez në Buenos Aires dhe homologun e tij amerikan Joe Biden në Washington, pas inaugurimit të tij në fillim të këtij viti.

Lula u detyrua të anulonte vizitën e tij shtetërore në Kinë muajin e kaluar për shkak të pneumonisë. Ai pritet të mbërrijë në Shangai të martën në mbrëmje dhe më vonë të udhëtojë për në Pekin ku do të takohet me homologun e tij Xi Jinping të premten.

Kina ka qenë partneri kryesor tregtar i Brazilit në 14 vitet e fundit, ndërsa vëllimi tregtar dypalësh ka tejkaluar 171 miliardë dollarët vitin e kaluar.