Presidenti iranian takon presidentin e Administratës Rajonale Kurde të Irakut

Presidenti iranian, Ibrahim Reisi, diskutoi zhvillimet dypalëshe dhe rajonale me Presidentin e Administratës Rajonale Kurde të Irakut (IKRG), Nechirvan Barzani, transmeton Anadolu Agency (AA).

Sipas deklaratës së publikuar në faqen e Presidencës së Iranit, Barzani, i cili erdhi në Teheran për të marrë pjesë në ceremoninë e betimit të Reis-it, zhvilloi një takim me presidentin iranian.

Në takim, Reisi deklaroi se marrëdhëniet me Irakun dhe KRG-në nuk janë në nivelin e dëshiruar.

"Ne duhet të ndërmarrim hapa të vendosur me mekanizma të qartë duke përdorur potencialet në dispozicion në mënyrë që të sigurojmë më shumë mirëqenie për popujt tanë", tha presidenti iranian.

Duke deklaruar se siguria dhe stabiliteti rajonal duhet të sigurohen nga vendet e rajonit, Reisi tha, "Vendet që kërkojnë hegjemoni e shohin veten si më të mirët dhe përpiqen t'i shfrytëzojnë ato. Ata kurrë nuk kanë ndërmarrë hapa efektivë për t'i dhënë fund paqëndrueshmërisë në rajon. Ata më tej nxisin problemet dhe grindjet aktuale. Vendet dhe popujt e rajonit nuk duhet t'i lejojnë këto forca të ndërhyjnë", deklaroi ai.

Barzani, nga ana e tij, deklaroi se si pjesë e Irakut, ata duan të zhvillojnë marrëdhënie ekonomike, kulturore dhe politike me Iranin në procesin e ri. "Ne kemi shumë potencial për të forcuar dhe rritur marrëdhëniet ekonomike", theksoi Barzani.

Ai tha se ata nuk do të lejojnë asnjë lëvizje nga zonat nën kontrollin e KRG-së që do ta prishë sigurinë e Iranit.