SHBA do të sigurojë 720 milionë dollarë ndihmë për Sirinë

SHBA njoftoi të enjten se do të sigurojë më shumë se 720 milionë dollarë ndihmë shtesë humanitare për Sirinë, transmeton Anadolu Agency (AA).

Kjo përfshin më shumë se 419 milionë dollarë nga Byroja e Asistencës Humanitare të Agjencisë Amerikane për Zhvillim Ndërkombëtar dhe më shumë se 301 milionë dollarë nga Byroja e Popullsisë, Refugjatëve dhe Migrimit të Departamentit të Shtetit.

"Komuniteti ndërkombëtar duhet të mbetet i përkushtuar për të përmbushur nevojat në rritje të popullit sirian", tha Sekretari i Shtetit, Mike Pompeo në një deklaratë.

Diplomati i lartë po ashtu bëri thirrje për mbajtjen e regjimit të Bashar al-Assad "përgjegjës për fushatën e tij shkatërruese ushtarake dhe shpërfilljen brutale të të drejtave të njeriut, përfshirë ndalimin arbitrar të mbi 100 mijë civilëve sirianë, shumica dërmuese e vendndodhjeve të të cilëve aktualisht nuk dihet".

Me këtë, Washingtoni ka siguruar më shumë se 12 miliardë dollarë që nga fillimi i krizës siriane.

Siria është shkatërruar nga lufta civile që nga fillimi i vitit 2011, kur regjimi i Asadit goditi protestuesit pro-demokracisë.

Qindra mijëra njerëz janë vrarë dhe më shumë se 10 milionë janë zhvendosur, sipas OKB-së.