Sulm artilerik mbi akademinë ushtarake të Mianmarit

Një grup rebelësh ka sulmuar akademinë ushtarake pranë Mandalay, qytetit të dytë më të madh në Mianmar, njoftoi ushtria, raporton Anadolu Agency (AA).

Akademia Teknologjike e Mbrojtjes (DSTA), e vendosur në Pyin Oo Lwin, një qytet kodrinor në rajonin Mandalay, u godit nga pesë predha artilerike herët në mëngjesin e djeshëm, tha zëdhënësi, Gjeneral Brigade Zaw Min Tun.

"Në këtë sulm u vra një civil dhe u plagos një ushtar në kompleksin e akademisë", konfirmoi ai përmes telefonit për AA.

Ai shtoi se pika e kontrollit ushtarak në Pyin Oo Lwin dhe baza ushtarake në Naung Cho në shtetin Shan u sulmuan gjithashtu nga një grup rebelësh të armatosur të paidentifikuar në mëngjesin e djeshëm.

Ai tha se sulmet ka gjasa të jenë si përgjigje të një sulmi të fundit ushtarak mbi fabrikat e drogës në shtetin Shan.

Disa media lokale raportojnë se sulmet u kryen nga Ushtria Çlirimtare Kombëtare Ta’ang (TNLA), një anëtare e koalicionit ushtarak të Aleancës Veriore që përbëhet nga grupe etnike kryengritëse që ende angazhohet në konflikte të armatosura ushtarake në zonat kufitare.

AA nuk arriti të marrë prononcim nga TNLA-ja.