Uragani Debby në SHBA shkaktoi të paktën 4 viktima

Të paktën 4 persona kanë humbur jetën nga uragani Debby, i cili ka përfshirë juglindjen e SHBA-së, veçanërisht shtetin e Floridës, transmeton Anadolu.

Sipas informacionit të ndarë nga Shërbimi Kombëtar i Motit (NWS), një shofer kamioni që humbi kontrollin e automjetit të tij në autostradën 75 në Tampa, Florida, ka vdekur.

Tre vdekjet e raportuara më parë nga zyrtarët shtetërorë përfshijnë një grua dhe një fëmijë 12-vjeçar që vdiqën në një aksident automobilistik dhe një adoleshent që vdiq pasi një pemë ra në një shtëpi të lëvizshme.

Uragani Debby u ngadalësua në një stuhi tropikale pasi arriti në tokë pranë qytetit bregdetar të Steinhatchee, Florida, me 80 milje (rreth 130 kilometra) në orë, sipas Qendrës Kombëtare të Uraganeve.

Ndërsa zyrtarët shtetërorë deklaruan se kishte përmbytje për shkak të lëvizjes së Debby brenda vendit, stuhia e fuqishme shkuli pemët, rrëzoi shtyllat e energjisë dhe ndërpreu energjinë elektrike për më shumë se 250 mijë klientë në të gjithë shtetin.

NWS theksoi se "uragane, reshje katastrofike dhe përmbytje bregdetare priten" në disa zona të juglindjes së vendit për disa ditë.

Për më tepër, sipas sajtit të gjurmimit të fluturimeve FlightAware, më shumë se 1.700 fluturime u anuluan dje dhe më shumë se 5.800 fluturime u shtynë.