Inflacioni në Evropë shënon rekord në muajin shkurt

Për shkak të rritjes së çmimeve të energjisë, në muajin shkurt inflacioni vjetor në Eurozonë arriti në 5,9 për qind, niveli më i lartë në rekord, transmeton Anadolu Agency (AA).

Zyra Evropiane e Statistikave (Eurostat) publikoi të dhënat vjetore të inflacionit për muajin shkurt për Bashkimin Evropian (BE) dhe Eurozonën.

Sipas të dhënave të Eurostat, inflacioni vjetor në BE, i cili ishte 5,6 për qind në muajin janar, u rrit në 6,2 për qind në muajin shkurt.

Ndërkohë, inflacioni vjetor në Eurozonë, i cili ishte 5,1 për qind në muajin janar, u rrit në 5,9 për qind në shkurt.

Të dhënat e Eurostat tregojnë se inflacioni në Eurozonë në muajin shkurt arriti nivelin më të lartë në 25 vitet e fundit.

Në muajin shkurt, kontribut më të madh në rritjen vjetore të inflacionit në Eurozonë kanë dhënë produktet energjetike, respektivisht me 3,12 për qind. Energjia u pasua nga shërbimet e ushqimit dhe alkoolit (1,04 për qind), produktet e duhanit (0,90 për qind) dhe produktet industriale jo-energjetike (0,81 për qind).

Në muajin shkurt, në Gjermani inflacioni ishte 5,5 për qind, në Francë 4,2 për qind, në Spanjë 7,6 për qind, në Itali 6,2 për qind, në Holandë 7,3 për qind, në Belgjikë 9,5 për qind, në Çeki 10 për qind, në Estoni 11,6 për qind, ndërsa në Lituani 14 për qind.

Inflacioni është shumë mbi objektivin prej 2 për qind të Bankës Qendrore Evropiane (BQE).

Rritja e inflacionit kohët e fundit ka shqetësuar edhe evropianët.

Në Evropë tërheq vëmendjen rritja e çmimeve të përgjithshme, veçanërisht në produktet e energjisë.