ЛОНДОН (АА) - На 48 локации во Велика Британија граѓаните се собраа и одржаа маршеви на поддршка на Палестина, повикувајќи на итен прекин на огнот во Газа, известува Анадолу.
Илјадници луѓе учествуваа на протестите одржани на 48 локации низ земјата на покана на невладините организации кои организираат маршеви за поддршка на Палестина од октомври минатата година.
Во главниот град Лондон се одржаа 11 протести со барање за прекин на огнот во Газа. Активистите се собраа во областа Камден и маршираа до канцеларијата на Кир Стармер, лидерот на главната опозициска Лабуристичка партија.
Активистите, кои ги критикуваа Стармер и британската влада дека го поддржуваат Израел и замижуваат пред геноцидот, извикуваа слогани „Слободна Палестина“, „Палестина ќе биде слободна од реката до морето“ и „Престанете да ги бомбардирате децата“.
„До денес се убиени повеќе од 31.000 цивили од таканаречените израелски одбранбени сили. Илјадници луѓе се под урнатините на уништените градови на Појасот Газа. Ова е воено злосторство“, рече Саби Сагал, копретседателот на Кампањата за солидарност со Палестина во Камден.
Сагал изјави дека Британија има одговорност пред Палестинците.
„Како Евреин, стојам покрај палестинскиот народ. Не можете да го решите овој проблем избирајќи една личност над друга. Ќе продолжиме со нашите протести додека Палестина не биде слободна“, изјави Сагал.
Лиз Витли, една од менаџерите на Унисон, еден од водечките синдикати во Британија, во својот говор рече дека Стармер се занимава со политика под водство на британската влада и американската администрација.
Пред канцеларијата на Стармер се собра и про-израелска група. Полицијата која сакаше да го спречи собирот на двете групи презеде опсежни безбедносни мерки.
Вчера маршеви за поддршка на Палестина се одржаа и во Бирмингем, вториот по големина град во земјата и во Кардиф.
Денес маршеви за поддршка на Палестина ќе има во Ливерпул, Лондон, Ридинг и Портсмут.
