Maqedoni e Veriut, qeveria ndryshon orarin e lëvizjes për festat e 1 Majit

Qeveria e Republikës së Maqedonisë së Veriut sot ka marrë vendim për ndryshimin e kufizimit të lëvizjes së qytetarëve në territorin e mbarë vendit gjatë festave të 1 Majit, në kuadër të masave kundër përhapjes së koronavirusit të ri (COVID-19), transmeton Anadolu Agency (AA).

Sipas një njoftimi të qeverisë, më 1, 2, 3 maj, gjegjësisht të premten, të shtunën dhe të dielën, do të lejohet lëvizja e qytetarëve prej orës 05:00 të mëngjesit deri në ora 14:00.

"Ndalesa për lëvizje në mbarë vendin do të fillojë në ora 14:00 dhe do të zgjasë deri ora 05:00 ditën e ardhshme, theksohet në njoftimin qeveritar", thuhet në njoftimin zyrtar të qeverisë.

Për personat mbi moshën 67-vjeçare, të premten, të shtunën dhe të dielën lejohet lëvizja prej orës 05:00 deri në ora 11:00.

Të gjithë fëmijët dhe personat deri në moshën 18 vjeç, të premten, të shtunën dhe të dielën do të mund të dalin prej orës 12:00 deri në ora 14:00.

Ndërkaq, siç njoftohet më tej, të gjitha masat e tjera për mbrojtje nga COVID-19 mbeten në fuqi.