ABNA-SE kërkon nga Egjipti të lirojë punonjësit e AA-së

Lidhja e Agjencive Lajmeve në Ballkan - Evropën Juglindore (ABNA-SE) kërkoi nga Egjipti të lirojë katër punonjësit e Anadolu Agency (AA) të arrestuar gjatë një bastisjeje në zyrën e saj në Kajro.

"ABNA-SE bën thirrje për lirimin e menjëhershëm të gazetarëve, të cilët mbahen pa asnjë informacion nga autoritetet egjiptiane", tha organizata në një deklaratë.

ABNA-SE e cilësoi bastisjen si "thellësisht shqetësuese".

Në deklaratë gjithashtu thuhet se bastisja e kryer nga policia egjiptiane është një "veprim flagrant që dëmton drejtpërdrejt lirinë e shtypit dhe komunitetin e gazetarisë".

"Ne nuk do të tolerojmë asnjë veprim që kërcënon drejtpërdrejt të drejtën tonë për lirinë e shprehjes dhe vlerat tona demokratike", theksohet në deklaratë.

Policia egjiptiane bastisi zyrën e AA-së në Kajro të martën në mbrëmje dhe arrestoi katër punonjës.

Anëtarët e stafit, përfshirë një shtetas turk, u dërguan në një vend të panjohur.

Turqia dënoi këtë veprim dhe bëri thirrje për lirimin e menjëhershëm të tyre.