MPB e Spanjës: Policia franceze ka arrestuar udhëheqësin e ETA-s

MADRID (AA) – Ministria e Punëve të Brendshme e Spanjës njoftoi se policia franceze ka arrestuar udhëheqësin e grupit militant bask ETA, raporton Anadolu Agency (AA).

Autoritetet spanjolle theksojnë se Mikel Irastorza “momentalisht është njeriu i parë” i ETA-s. Bëhet e ditur se të shtunën në mëngjes është arrestuar në qytetin francez Ascain në afërsi të kufirit me Spanjën.

ETA në vitin 2011 bëri të ditur se heq dorë nga përdorimi i dhunës në luftën e saj për fitimin e pavarësisë së Baskisë, rajon në Spanjën veriore dhe Francën jugperëndimore.

Grupi militant, i cili fajësohet për më shumë se 800 raste të vdekjes që nga vrasja e parë në vitin 1968, nuk është shpërbërë.

Policia franceze paralajmëroi se do të vazhdojë hetimin për ETA-n dhe nuk përjashtoi se mund të ketë ende arrestime.