Nënpresidenti i Malavit humb jetën në aksident avioni së bashku me 9 të tjerë

Nënpresidenti i Malavit, Saulos Chilima, dhe nëntë të tjerë në bordin e një avioni ushtarak që u zhduk të hënën në mëngjes, kanë vdekur të gjithë, njoftoi presidenti i vendit, transmeton Anadolu.

Duke iu drejtuar kombit sot pasdite, presidenti Lazarus Chakwera tha se të gjithë ata që ishin në bordin e avionit vdiqën menjëherë pasi ai u rrëzua në zonën e pyllëzuar Chikangawa në qytetin verior Mzuzu në rrugën e kthimit për në Lilongwe pasi nuk kishte arritur të ulej në Aeroportin Ndërkombëtar të Mzuzus për shkak të dukshmërisë së dobët të motit.

“Dr. Saulos Klaus Chilima ishte njeri i mirë. Qytetar patriot i vendit. Një nënpresident i fuqishëm që i shërbeu vendit të tij me dallim. Ishte një nga nderimet më të mëdha të jetës sime që e kisha atë si zëvendës dhe këshilltar tim për katër vitet e fundit”, tha Chakwera.

Mbetjet e avionit u gjetën sot në mëngjes pa asnjë të mbijetuar.

Në mesin e të vdekurve është edhe ish-zonja e parë Shanil Muluzi.

Avioni që mbante nënpresidentin u largua nga kryeqyteti Lilongwe të hënën, rrugës për në qytetin e rajonit verior të vendit, Mzuzu, ku ai ishte planifikuar të merrte pjesë në një ceremoni mortore të ish-ministrit të drejtësisë dhe prokurorit të përgjithshëm të vendit, Ralph Kasambara, i cili vdiq papritur të premten.

Sipas Forcave të Mbrojtjes së Malavit, avioni nuk u ul siç ishte planifikuar në Aeroportin Ndërkombëtar të Mzuzus për shkak të dukshmërisë së dobët të motit dhe u detyrua të kthehej në Lilongwe, por më vonë u zhduk nga radari gjatë kthimit.

51-vjeçari Saulos Chilima, ekzekutiv korporate i kthyer në politikan, iu bashkua vijave të para të politikës në vitin 2014 kur u bë nënpresident i Arthur Peter Mutharikas. Në vitin 2020, ai u bashkua me presidentin Chakwera në zgjedhje të reja pasi gjykata kushtetuese kishte anuluar zgjedhjet e vitit 2019.