Shpërthime të fuqishme në Vullkanin Shishaldin në Alaskë

Dy shpërthime të fuqishme kanë ndodhur në Vullkanin Shishaldin në shtetin amerikan të Alaskës, transmeton Anadolu Agency (AA).

Zyrtarët e Observatorit Vullkanik të Alaskës njoftuan se shpërthimi i parë në vullkanin që gjendet në Ishujt Aleutian ka ndodhur dje në orët e mëngjesit sipas kohës lokale.

Autoritetet thanë se hiri vullkanik ka arritur fillimisht në 5.791 metra, ndërsa më vonë deri në 7.620 metra.

Shërbimi Kombëtar Ajror i SHBA-së lëshoi paralajmërim për pilotët, duke thënë se hiri është përhapur edhe në rutën e fluturimeve. Ky institucion po ashtu e ngriti në nivel alarmi paralajmërimin pas shpërthimeve.

Siç bëhet e ditur, nën ndikimin e erërave, retë e zeza të shkaktuara nga hiri vullkanik kanë arritur deri në Detin e Beringut.

Shishaldin, një nga vullkanët më aktivë në harkun vullkanik Aleutian, shpërtheu edhe muajin e kaluar, kur hiri arriti një lartësi prej 7.600 metrash.

Hiri i nxjerrë nga vullkani shpesh dëmton motorët e avionëve që fluturojnë midis Amerikës së Veriut dhe Azisë.