Sulm në një shkollë në Idlib, dy fëmijë të vdekur

Së paku dy fëmijë kanë humbur jetën, ndërsa pesë të tjerë janë plagosur gjatë sulmit mbi një shkollë në fshatin Sheikh Idris në veriperëndim të rajonit sirian Idlib, i cili është shpallur zonë e deeskalimit për civilë, raporton Anadolu Agency (AA).

Bëhet fjalë për një shkollë në juglindje të Idlibit, ndërsa sipas të dhënave paraprake, theksuan nga Mbrojtja Civile “Helmetat e Bardha”, kanë humbur jetën dy nxënës. Ata shprehën druajtje se numri i të vdekurve mund të rritet.

Sulmet në orët e mëngjesit i kryen pjesëtarët e regjimit të presidentit sirian Bashar Al-Asad dhe palët e grupeve terroriste.

Idlibi është një nga enklavat më të mëdha të kontrolluara nga opozita në Siri. Me ndërmjetësimin e Turqisë dhe Rusisë në Soçi në shtator të vitit të kaluar, u arrit marrëveshje mbi armëpushimin në Idlib dhe krijimin e zonave të deeskalimit për civilët.

Në pajtim me marrëveshjen, forcat opozitare në tetor tërhoqën armatimin e rëndë nga rajoni, ndërsa forcat besnike të regjimit të Asadit kanë kryer një varg sulmesh artilerike dhe ajrore në këtë rajon.

Rrjeti për të Drejtat e Njeriut në Siri (SNHR) në raportin e fundit theksoi se gjatë sulmeve të regjimit që nga fillimi i vitit në Idlib janë vrarë së paku 175 civilë, ndërsa 480 janë plagosur.