Tonga përballet me vështirësi komunikimi pas shpërthimit të vullkanit

Vështirësi komunikimi u raportuan në Tonga pas një shpërthimi masiv vullkanik nënujor në vendin e Paqësorit, sipas mediave lokale, transmeton Anadolu Agency (AA).

Në një konferencë shtypi, kryeministrja e Zelandës së Re Jacinda Ardern tha se komunikimi me vendin ka qenë i vështirë për shkak të shpërthimit, por se Forcat e Mbrojtjes së vendit të saj dhe Ministria e Jashtme po punojnë për të ndihmuar Tongën, raportoi transmetuesi publik Radio Zelanda e Re (RNZ).

“Komisioni i Lartë i Zelandës së Re në Nuku'alofa (kryeqyteti i Tongës) është në kontakt me autoritetet lokale dhe vlerësimet e dëmeve janë duke u zhvilluar”, tha RNZ.

Ndërsa linjat telefonike dhe interneti mbeten jofunksionale për një pjesë të Tongës, njerëzit filluan të përdorin mediat sociale për t'u lidhur me të dashurit e tyre, raportohet më tej.

"Ka raportime të pakonfirmuara se këshillimi për cunami në Tonga është ende aktiv dhe se kryeministri i Tongës ka autorizuar furrat e bukës, stacionet e benzinës dhe dyqanet për të siguruar gjërat e nevojshme”, vuri në dukje transmetuesi.

Qendra e Paralajmërimit për Cunami pranë Shërbimit Kombëtar të Motit të SHBA-së ka lëshuar një paralajmërim për cunami në bregun perëndimor të SHBA-së dhe Kanadasë pas shpërthimit vullkanik që goditi Tongën.

Vullkani, 65 kilometra në veri të Nuku'alofa-s, kishte filluar të derdhte hi, avull dhe gaz të premten në mëngjes.