Cüneyt Karadağ
18 Maj 2022•Përditësim: 18 Maj 2022
Më shumë se 200 ukrainas që jetojnë në Gjermani u mblodhën të martën përpara ambasadës turke në Berlin duke i kërkuar udhëheqësit turk të ndihmojë ukrainasit në luftën e tyre të vazhdueshme me Rusinë, raporton Anadolu Agency (AA).
Duke brohoritur në turqisht "Turqi shpëto Mariupolin", protestuesit i kërkuan presidentit turk, Recep Tayyip Erdoğan, të ndihmojë ushtarët dhe civilët ukrainas të bllokuar në qytetin port të rrethuar të Mariupolit.
Eva Yakubovska, një nga demonstrueset tha se protestuesit bënë një thirrje të ngjashme për ndihmë para Ambasadës Turke në Berlin dy javë më parë, duke vënë në dukje se banorët "janë ngujuar" në Mariupol për më shumë se dy muaj.
"Është e pabesueshme. Këta njerëz duhet të gjejnë ujë dhe ushqim. Rreth 500 civilë janë gjithashtu të bllokuar në qytet", tha ajo.
Yakubovska tha se banorët duhet të evakuohen sa më shpejt të jetë e mundur. "Siguria e evakuimit të këtyre njerëzve nuk duhet të sigurohet vetëm nga Ukraina dhe Rusia, duhet të përfshihet edhe shteti turk për evakuim të sigurt", u shpreh Yakubovska.
Ajo theksoi se opsioni më i mirë për evakuimin e ushtarëve dhe civilëve të bllokuar në Mariupol është nga deti. "Në të njëjtën kohë, Turqia është një vend i fuqishëm dhe mund të arrijë evakuimin duke ofruar siguri", shtoi ajo.
- "E drejta e njerëzve për të ekzistuar"
Vladyslava Vorobiova, një tjetër protestuese, tha se duhet të mbrohet "e drejta e njerëzve për të ekzistuar" në Mariupol.
"Njerëzit që u mblodhën para ambasadës turke në Berlin duan të shpëtojnë jetë, ata duan të shpëtojnë jo vetëm jetën e ukrainasve, por edhe jetën e të gjithë njerëzve në Mariupol. Mariupoli ka qenë nën rrethimin rus që nga fillimi i luftës, njerëzve iu hoq e drejta për të jetuar atje, ne jemi këtu për ta", tha ajo.
Vorobiova nënvizoi se Turqia është i vetmi vend që mund të evakuojë njerëzit nga Mariupol nga deti.
"Turqia na mbështeti dhe ne jemi shumë mirënjohës për këtë. Por për Mariupolin, ne kemi ende nevojë për një lëvizje të fortë dhe evakuim sa më të shpejtë, sepse çdo sekondë ka rëndësi", tha ajo.
Suat Palabas tha se ai jetonte në kryeqytetin ukrainas, Kiev, por erdhi në Gjermani për shkak të luftës.
"Ne duam që Turqia të ndërmjetësojë dhe të ndihmojë në përfundimin e luftës. Turqia është një vend i besueshëm. Ukrainasit e dinë se do të ndihmohen. Për shkak se i besojnë Turqisë, ata kërkojnë ndihmë nga Turqia", shtoi ai.
