Zgjedhje parlamentare në Pakistan më 25 korrik

ISLAMABAD (AA) – Komisioni Suprem Zgjedhor i Pakistanit ka njoftuar se zgjedhjet parlamentare do të mbahen më 25 korrik, këtë vit, transmeton Anadolu Agency (AA).

Në njoftim theksohet se presidenti pakistanez, Mamnoon Hussain, aprovoi datën e propozuar për mbajtjen e zgjedhjeve për përbërjen e re të parlamentit shtetëror dhe parlamenteve në provincat pakistaneze.

Kushtetuta e Pakistanit urdhëron që zgjedhjet parlamentare të mbahen në afat prej 60 ditëve nga dita e skadimit të mandatit të përbërjes së kaluar.

Këto do të jenë zgjedhjet e para parlamentare qëkur Gjykata Supreme shkarkoi nga detyra ish-kryeministrin e Pakistanit, Nawaz Sharif, për shkak të fshehjes së parave jashtë vendit.

Sharif ende është në krye të partisë politike dhe analistët i parashikojnë një rezultat të mirë zgjedhor, pavarësisht nga skandalet e korrupsionit dhe kritikat e tij të hapura ndaj ushtrisë mbi prezencën e madhe në skenën politike në Pakistan.