Başakşehir ndërpret bashkëpunimin me menaxherin Okan Buruk

Klubi turk i futbollit Medipol Başakşehir njoftoi se ka ndërprerë bashkëpunimin me menaxherin e tij Okan Buruk, raporton Anadolu Agency (AA).

Başakşehir përmes një deklarate theksoi se klubi dhe menaxheri turk Buruk në mënyrë reciproke u dakorduan të ndërpresin bashkëpunimin.

Ish-mesfushori i Galatasaray dhe Inter Milan, Buruk drejtonte Başakşehir që nga sezoni 2019-20, duke e udhëhequr klubin e Stambollit drejt titullit të parë të kampionit ndonjëherë në Super Ligë në vitin 2020.

Başakşehir falënderoi Buruk dhe stafin e tij për përpjekjet që bënë drejt fitores së kampionatit turk sezonin e kaluar dhe i “uruan gjitha të mirat në karrierën e tij”.

Trajneri 47-vjeçar fitoi Kupën e Turqisë me Akhisarspor në sezonin 2017-18.

Në epokën e Burukut, Başakşehir u kualifikua në fazën e grupeve të Ligës së Kampionëve të UEFA-s 2020-21.

Por ekipi i Stambollit është eliminuar në fazën e grupeve në dhjetor pas ndeshjes me gjigantin francez Paris Saint-Germain, klubin gjerman RB Leipzig dhe klubin anglez Manchester United.

Këtë javë Başakşehir pësoi disfatë nga Trabzonspor 2:1 në Super Kupën Turke 2020 në Stadiumin Olimpik Ataturk të Stambollit.

Başakşehir po përjeton një sezon të turbullt në Super Ligë. Ata kanë 24 pikë në javën e 20-të duke u radhitur në vendin e 15-të në renditje të udhëhequr nga rivalët e qytetit Beşiktaş, të cilët kanë grumbulluar 44 pikë.