Izraeli miraton ndërtimin e 3.000 banesave në Bregun Perëndimor

JERUSALEM (AA) - Bëhet e ditur se kryeministri i Izraelit, Benjamin Netanyahu dhe ministri i Mbrojtjes, Avigdor Liberman kanë miratuar ndërtimin e 3.000 banesave të reja në Bregun Perëndimor për kolonët hebrenj, transmeton Anadolu Agency (AA).

Ministri i Mbrojtjes Liberman përmes një deklarate me shkrim ka theksuar se vendimi për ndërtimin e tre mijë banesave të reja në Bregun Perëndimor është marrë me qëllim që të plotësohen nevojat e kolonëve dhe që të lehtësohet jeta e tyre.

Ndërkaq, sipas gazetës izraelite Yedioth Ahronoth, menjëherë do të fillojë ndërtimi i dy mijë nga banesat e reja që do të ndërtohen në vendbanimet kolone hebreje në rajone të ndryshme të Bregut Perëndimor, ndërsa një mijë banesat e tjera do të bëhen gradualisht në periudhë të mëvonshme.

Ndryshe, kryeministri izraelit Netanyahu javën e kaluar po ashtu miratoi ndërtimin e dy mijë banesave të reja në vendbanimet kolone hebrenje në Bregun Perëndimor.

Jerusalemi Lindor dhe Bregu Perëndimor gjenden të okupuara nga Izraeli që nga viti 1967. Në Jerusalemin Lindor gjenden mbi 200 mijë kolonë hebrenj, ndërsa në Bregun Perëndimor mbi 400 mijë. Sipas ligjeve ndërkombëtare, të gjitha vendbanimet hebreje në këto rajone konsiderohen ilegale.