Juncker: Aleanca e sigurisë BE-Britani do të mbijetojë

MYNIH (AA) - Presidenti i Komisionit Evropian, Jean-Claude Juncker deklaroi se aleanca e sigurisë mes Bashkimit Evropian dhe Britanisë së Madhe do të mbijetojë pas Brexit-it, raporton Anadolu Agency (AA).

Juncker mbajti fjalim pasi kryeministrja britanike Theresa May ftoi partnerët nga BE-ja që të mos lejojnë që "marrëveshjet e ngushta institucionale" të pengojnë partneritetin e madh të sigurisë.

"Besoj, pasi nuk jemi në luftë me Britaninë e Madhe dhe nuk duam të hakmerremi ndaj vendimit të qytetarëve të saj, se kjo aleancë e sigurisë, ura e sigurisë midis Britanisë së Madhe dhe Bashkimit Evropian do të mbahet. Ajo edhe më tej na duhet", tha Juncker në konferencën e sigurisë në Mynih.

Juncker theksoi se çështjet e ardhshme të sigurisë nuk duhet të ngatërrohen me çështje të tjera që lidhen me Brexit, duke shtuar se ato duhet të konsiderohen individualisht.