Libi, rritet në 55 numri i të vdekurve nga përleshjet në Tripoli

Numri i të vdekurve nga përleshjet e armatosura në kryeqytetin libian Tripoli që shpërthyen vonë të hënën është rritur në 55, thanë zyrtarët, transmeton Anadolu.

Qendra e Mjekësisë dhe Mbështetjes Emergjente tha se 146 persona u plagosën gjithashtu në luftimet midis Forcës Speciale të Parandalimit të lidhur me Këshillin Presidencial dhe Brigadës 444 të Qeverisë së Unitetit Kombëtar.

“Ekuipazhet e qendrës ishin në gjendje të evakuonin 234 familje nga zonat e përleshjeve”, tha Qendra.

Përplasjet shpërthyen pasi Mahmud Hamza, komandanti i Brigadës 444, u arrestua nga Forca Speciale e Parandalimit në Aeroportin Ndërkombëtar Mitiga.

Më herët të martën, zëdhënësi i Qeverisë së Unitetit Kombëtar të Libisë, Mohamed Hammouda, tha për Anadolu se kryeministri Abdul Hamid Dbeibeh kishte rënë dakord me figurat lokale në zonën Souq al-Jumaa në Tripoli për një armëpushim dhe dorëzimin e komandantit të Brigadës 444 tek një palë neutrale.

Souq al-Jumaa është një nga zonat më të mëdha në kryeqytetin Tripoli, prej nga vjen edhe komandanti i Forcave Speciale të Parandalimit, Abdul Raouf Kara.

Më 28 maj, Tripoli përjetoi përleshje që zgjatën për orë të tëra midis dy grupeve pas ndalimit të një anëtari drejtues të Brigadës 444.