Refugjatët e Republikës së Afrikës Qendrore kthehen nga RD e Kongos

Qindra refugjatë të Republikës së Afrikës Qendrore (RAQ) janë kthyer nga Republika Demokratike e Kongos (DRC), lëvizja e parë e tillë që nga mbyllja e kufijve për shkak të pandemisë së COVID-19, tha Agjencia e Refugjatëve e OKB-së, transmeton Anadolu Agency (AA).

Në një deklaratë, UNHCR tha se operacioni vullnetar i riatdhesimit të refugjatëve nga Republika e Afrikës Qendrore filloi në nëntor 2019, "por u ndërpre në mars të vitit 2020 pasi të dy vendet kishin mbyllur kufijtë e tyre për të parandaluar përhapjen e koronavirusit".

"Pandemia e koronavirusit ndërpreu ëndrrat e refugjatëve për t'u kthyer në shtëpi, si dhe shumë aspirata të tjera njerëzore. Ky rifillim i kthimit të refugjatëve shënon një kapitull tjetër në jetën e shumë refugjatëve. Ata mund të shkojnë në shtëpi, duke përqafuar vendin e tyre", tha Zëvendëspërfaqësuesi i UNHCR-së në RD të Kongos, Pierre Atchom.

Dhuna midis grupeve të armatosura që filloi në vitin 2012 ka detyruar mbi gjysmë milioni njerëz të largohen nga RAQ.

Mijëra njerëz janë zhvendosur brenda RAQ, duke kaluar javë duke u fshehur në pyje pa ushqim dhe ujë, sipas Agjencisë së Refugjatëve të OKB-së.

Kameruni, Çadi, RD e Kongos dhe Republika e Kongos fqinje strehuan shumicën e refugjatëve të RAQ.

UNHCR theksoi se planifikon të ndihmojë rreth 4 mijë refugjatë deri në fund të vitit 2020 në procesin e riatdhesimit vullnetar, duke e çuar totalin në 7 mijë që nga korriku i vitit 2019.