Rrëshqitjet e dheut në Kenia, shkon në 43 bilanci i të vdekurve

Bilanci i të vdekurve nga rrëshqitjet e dheut në perëndim të Kenias nga shirat e dendur është rritur në 43, transmeton Anadolu Agency (AA).

John Lonyangapuo, guvernatori i West Pokot Country, u tha gazetarëve se shumë njerëz mbeten të pagjetur, duke konfirmuar numrin e ri të vdekjeve.

Mijëra mbetën të pastrehë pasi shtëpitë e tyre u përfshinë nga përmbytjet për shkak të reshjeve mbi mesataren ndërsa meteorologët paralajmërojnë ende reshje shiu në ditët në vijim.

Presidenti i Kenias, Uhuru Kenyatta tha se ka urdhëruar shpërndarjen e personelit të shpëtimit nga agjenci të ndryshme sigurie dhe humanitare, përfshirë Forcat e Mbrojtjes dhe Shërbimin e Policisë Kombëtare për të parandaluar humbjen e mëtejme të jetëve në rajonin e goditur nga rrëshqitjet e tokës.

Kenyatta më tej drejtoi komisarët rajonalë në rajonet e goditura nga rrëshqitjet e dheut në vendin e Afrikës Lindore që të punojnë ngushtë me ekipet e sigurisë dhe ato humanitare për të siguruar që popullata të zhvendoset në hapësira më të sigurta.