Shefi i OBSH-së: Shëndeti krijohet në shtëpi, jo në spital

Shefi i Organizatës Botërore të Shëndetësisë (OBSH), Tedros Adhanom Ghebreyesus, ka deklaruar se shëndeti nuk krijohet kryesisht në spitale apo klinika, por ai krijohet në shtëpi, rrugë, tregje, vende pune dhe mjedis, transmeton Anadolu.

Shefi i OBSH-së po fliste në samitin H20, një platformë e pavarur vjetore që mbështet presidencën e G20-tës në një iniciativë të quajtur “E ardhmja e diplomacisë shëndetësore globale në një botë në ndryshim”.

“Thuhet se shëndeti bëhet në shtëpi dhe spitalet janë për riparim. Ai krijohet në ajrin që njerëzit thithin, ushqimin që hanë dhe kushtet në të cilat jetojnë dhe punojnë”, tha shefi i OBSH-së në fjalën e hapjes së samitit, duke cituar filozofin holandez Erasmus, i cili tha se parandalimi është më i mirë se kurimi.

Tedros tha se 500 vjet më vonë, bota ende po mëson nga Erasmus.

Për këtë arsye, theksoi ai, mbajtja e njerëzve të shëndetshëm dhe parandalimi i sëmundjeve është një nga tre prioritetet kryesore në strategjinë globale të OBSH-së për katër vitet e ardhshme.

“Sigurisht, kur njerëzit kanë nevojë për kujdes, ata duhet të jenë në gjendje të përdorin shërbimet shëndetësore që u nevojiten pa u përballur me vështirësi financiare”, theksoi ai.

Sipas tij, një prioritet tjetër i OBSH-së është sigurimi i shëndetit duke mbështetur vendet në ri-orientimin e sistemeve të tyre shëndetësore drejt kujdesit shëndetësor parësor, i cili është themeli i mbulimit shëndetësor universal.

Gjysma e botës nuk ka qasje në shërbimet shëndetësore

Më tej, Tedros tha se gjysma e botës n uk ka qasje në shërbimet thelbësore shëndetësore dhe se 2 miliardë njerëz po përballen me vështirësi financiare për shkak të shpenzimeve shëndetësore që tejkalojnë xhepin e tyre.

“Të tilla boshllëqe i ekspozojnë njerëzit ndaj vuajtjeve dhe vdekjeve të shmangshme, por gjithashtu ekspozojnë individët, familjet, komunitetet, kombet dhe mbarë botën ndaj ndikimit të epidemive dhe pandemive”, tha shefi i OBSH-së.

Ai tha se për këtë arsye, një tjetër prioritet i OBSH-së është ta bëjmë botën më të sigurt, duke forcuar sigurinë shëndetësore globale.

“Marrëveshja e re e pandemisë, për të cilën vendet anëtare kanë negociuar, është një instrument i së drejtës ndërkombëtare për ta mbajtur botën më të sigurt. Përveç kësaj, paketa e amendamenteve mbi Rregulloret Ndërkombëtare të Shëndetit që miratuan vendet anëtare (të OBSH-së) është një arritje historike dhe një sinjal i fortë se multilateralizmi është i gjallë dhe i mirë”, tha Tedros.

Tedros gjithashtu theksoi se në të njëjtën kohë bota përballet me një numër në rritje të krizave humanitare, duke përfshirë Ukrainën, Sudanin dhe territorin e pushtuar palestinez, veçanërisht Gazën.

"OBSH po vepron në një mjedis gjithnjë e më kompleks, përballë sfidave duke përfshirë ndryshimin e klimës, plakjen, migrimin, përparimin e shkencës dhe teknologjisë dhe një mjedis të fragmentuar gjeopolitik", tha Tedros, duke theksuar se "multilateralizmi është kritik" përballë këtyre sfidat.

Siç tha ai, bota ka nevojë për angazhim të nivelit të lartë dhe një angazhim për t'i dhënë përparësi shëndetit në nivelin më të lartë politik, duke përfshirë G7 dhe G20.

“Në deklaratën e tyre këtë vit, udhëheqësit e G7-tës shprehën edhe një herë mbështetjen e tyre të fortë për shëndetin global dhe njohën rolin e OBSH-së”, tha Tedros, duke kërkuar investime në OBSH si në popullsi më të shëndetshme, së bashku me shoqëri më të drejta, të qëndrueshme dhe të sigurta.

Tedros tha se vitet 2024 dhe 2025 do të jenë vite plot me mundësi për shëndetin global.

"Kjo përfshin takime të nivelit të lartë për rezistencën antimikrobike dhe NCD-në (sëmundjet jo të transmetueshme), COP29-tën për krizën klimatike që përfshin një fokus në shëndetin, si dhe finalizimin e negociatave për marrëveshjen e pandemisë”, tha shefi i OBSH-së.