Zelanda e Re vitin e ardhshëm planifikon rihapjen e kufijve për udhëtarët ndërkombëtarë

Në kuadër të hapave të normalizimit që do të ndërmerren ndaj pandemisë së koronavirusit të ri (COVID-19), kufijtë e Zelandës së Re do të rihapen për udhëtarët ndërkombëtarë në fillim të vitit të ardhshëm, transmeton Anadolu Agency (AA).

Zelanda e Re konsiderohet si një nga vendet që luftoi me sukses pandeminë COVID-19, ndërkohë qeveria e këtij vendi ka planifikuar ndërmarrjen e hapave të normalizimit.

Kryeministrja e Zelandës së Re, Jacinda Ardern, tha se janë duke pritur që fushata e vaksinimit të përfundojë deri në fund të vitit dhe se kufijtë nuk do të hapen deri në atë kohë.

Ardern theksoi se me përfundimin e vaksinimit, Zelanda e Re do të hapë dyert e saj për udhëtarët ndërkombëtarë nga tremujori i parë i vitit të ardhshëm.

- Turizmi është ndër sektorët kryesorë në vend

Vendimi i qeverisë për hapjen e kufijve u mirëprit nga komuniteti i biznesit.

Turizmi është një nga sektorët kryesorë në vend, i cili pret rreth 3 milionë turistë çdo vit.

Kryeministrja Ardern gjithashtu njoftoi se do të zgjasin periudhën midis dozës së parë dhe dozës së dytë të vaksinës Pfizer nga 3 në 6 javë.

Zelanda e Re, e cila ka një popullsi prej rreth 5 milionë banorësh, deri më sot ka regjistruar gjithsej 2.913 raste me COVID-19 dhe 26 viktima.