Zelandë e Re, në prag të zgjedhjeve Facebook mbyll faqen e një partie

Gjiganti i mediave sociale Facebook ka hequr faqen e një partie politike në Zelandën e Re në prag të zgjedhjeve të përgjithshme, transmeton Anadolu Agency (AA).

Në një deklaratë sot partia "Advance New Zeland" akuzoi Facebook-un për "ndërhyrje" në zgjedhjet e vendit.

"Vendimi i Facebook-ut për të hequr faqen e një partie të regjistruar politike në Zelandën e Re, dy ditë para zgjedhjeve, nuk është asgjë më pak se ndërhyrje në zgjedhje", tha bashkë-drejtuesi i partisë, Jami-Lee Ross.

Zelanda e Re do të shkojë në zgjedhje të shtunën për të zgjedhur qeverinë e re pasi sondazhet e fundit të opinioneve të publikuara sot nga 1News Colmar Brunton dhe agjencitë e kërkimit social tregojnë se kryeministrja, Jacinda Ardern është në rrugën e duhur për të fituar mandatin e dytë.

Faqja u hoq sot derisa partia transmetonte drejtpërdrejt një ngjarje nga bashkë-drejtuesi Billy Te Kahika.

Ross tha 30 minuta para se të hiqej faqja e partisë ai ishte "paralajmëruar nga një gazetar se faqja e partisë po mbyllej".

"Ky është një shembull cinik i ndërhyrjeve në zgjedhje nga një media sociale në pronësi të SHBA-së e cila nuk kryen asnjë operacion të tillë në kombin tonë sovran", shtoi Ross.

Megjithatë, një përfaqësues i Facebook-ut i tha Radio Zelandës së Re: "Ne nuk lejojmë askënd të ndajë dezinformata në platformat tona në lidhje me COVID-19 që mund të çojë në dëme të afërta fizike. Ne kemi politika të qarta kundër këtij lloji të përmbajtjes dhe do të zbatojmë këto politika pavarësisht nga pozicioni politik ose përkatësia partiake e kujtdoqoftë".

Ross tha se partia e tij ka qenë "duke diskutuar me guxim qasjen e qeverisë ndaj COVID-19, duke ndarë pikëpamjet dhe këshillat e shkencëtarëve ndërkombëtarë".

"Ne kemi hequr faqen e Advance New Zeland/Partisë Publike të Zelandës së Re në Facebook për shkelje të përsëritura të kësaj politike", tha përfaqësuesi i Facebook-ut.

Duke bërë thirrje për një hetim të ndërhyrjes së pretenduar të Facebook-ut në zgjedhje, partia tha: "Nëse Facebook dëshiron të ardhura nga reklamat nga Zelanda e Re, atëherë Facebook duhet të njohë lirinë e fjalës në vendin tonë".

Partia mori mbështetje nga Shtëpia e Bardhë pasi zëdhënësja e saj Kayleigh McEnany shkroi në Twitter: “Censura duhet të dënohet! "Twitter&Facebook. Jo në mënyrën amerikane".

Beteja e Zelandës së Re kundër COVID-19 është njohur gjerësisht pasi vendi arriti të parandalojë përhapjen e infeksionit.

Ardern dhe Partia e saj e Punës janë ndër të preferuarit për fitore. Shanset kryesisht janë rritur nga suksesi i saj në udhëheqjen e luftës kundër infeksionit vdekjeprurës.

Vendi ka raportuar gjithsej 1.876 raste të koronavirusit deri më tani, përfshirë 25 vdekje dhe mbi 1.800 të shëruar. Autoritetet shëndetësore kanë kryer mbi 1 milion teste.