Capello: Problemi i Realit është Ronaldo

MADRID (AA) – Trajneri i njohur italian Fabio Capello (70), i cili në mesin e shumë klubeve ka drejtuar edhe Real Madridin, konsideron se problemi momental i “klubit madrilen” është ylli i saj më i madh portugez Cristiano Ronaldo, raporton Anadolu Agency (AA).

Reali gjendet në një seri prej katër ndeshjesh pa fitore, por edhe pa humbje. Madrilenët barazuan me Villarealin, Las Palmas dhe Eibar në La Ligën spanjole, dhe me Borusia Dortmund në Ligën e Kampionëve.

“Mbretërit” për herë të fundit kanë fituar më 18 shtator si mysafir në Espanyol me 2:0. “Problemi momental i Real Madridit është Cristiano Ronaldo. Sepse nuk është i përgatitur mirë fizikisht, ndërsa është futbollisti i tyre më i mirë”, ishte i qartë Capello në deklaratën për mediat spanjolle.

Capello në karrierën e tij të pasur si trajner nga dy herë ka drejtuar Milanin dhe Real Madridin, ndërsa nga një herë Romën dhe Juventusin. Ai ishte edhe trajneri i Anglisë dhe i Rusisë.